Det var torsdag kveld og natt til fredag Statens vegvesen skulle sjekka viftene i Lyderhorntunnelen. Det vart då oppdaga ein alvorleg feil som gjorde at tunnelen måtte stengjast.
– Frå Sotra står køane framleis frå Kolltveittunnelen og austover. Også frå Askøy er det lange køar. I praksis har det vore samanhengande rushtrafikk heile dagen, seier vaktoperatør Hanne Norheim til Vestnytt i 15-tida fredag.
Truleg vert tunnelen periodevis opna i løpet av helga. Klokka 15.30 viser webkamera til Vestnytt at trafikken står heilt i ro over Straumssundet. Også i Drotningsvik viser kameraet at trafikken går sakte mot aust. Klokken 18.40 går trafikken betre, men det er framleis kø i retning Bergen over Sotrabrua. Veitrafikksentralen anslår at det antakeligvis vil ta endå fleire timar før køane løsar seg.
Følg trafikken live
Var aldri i tvil om at tunnelen måtte stengjast
Vegtrafikksentralen ser så langt ingen ende på køane, og Norheim har ingen andre råd til trafikantane enn å la vera å legga ut på vegen dersom ein kan venta med å reisa.
– Me gav tidlegare råd om å nytta vegen om Mathopen som alternativ for å koma seg til Loddefjord vestfrå. Men no på ettermiddagen er det jo mange av dei som bur i området som skal heim. Med omkøyringstrafikk i tillegg kan det bli kork der og, seier vaktoperatøren.
Laurdag vil tunnelen vera open mellom klokka 08.00 og 10.00. Om arbeida ikkje blir ferdig i løpet av helga, vil det bli opna for morgentrafikken måndag, mellom klokka 06.30 og 09.00.