Her blir det god plass no

Kinoen på Straume held ope, men kan berre ha tjue personar i kvar sal.

Korona-tiltaka som kom fredag, inneber at det er forbod mot forsamlingar på meir enn tjue personar. Mange kulturtilbod, inkludert nokre kinoar, har stengt dørene. Men Sotra Kino held ope.

Vestnytt får opplyst at filmprogrammet går som planlagt, med eitt unntak: Det kan berre vera tjue personar i kvar sal under kvar filmframsyning.

Om Sotra Kino snurrar film samstundes i alle fem salar, kan dei altså maksimalt ha hundre kinogjengarar innanfor dørene.

Det er kinoens dag laurdag, men det blir alt anna enn den billettfesten kinoane er vande med. I tilfelle der folk har kjøpt billett på førehand og no ikkje slepp inn fordi det er seld meir enn tjue billettar, vil dei få pengane tilbake.

Det er grunn til å understreka at kommunane ber folk halda seg heime, sjølv om det altså formelt er lov å nytta seg av kulturtilbod.